నేత్ర న్యూస్, విశాఖపట్నం : బాలల దినోత్సవం ప్రపంచ క్రీడా దినోత్సవాన్ని తలపించే విధంగా జరిగిందని ముఖ్య అతిథులుగా పాల్గొన్న ఎంఈవోలు ఎం.సునిత, బి.పుష్య రాగం అన్నారు. మంగళవారం సాయంత్రం అక్కయ్యపాలెం, పోర్టు స్టేడియం, విశ్వనాథ్‌ కన్వెన్షన్స్‌లో స్కూల్‌ ఆఫ్‌ వండర్‌ కిడ్స్‌ ఆధ్వర్యంలో జరిగిన రన ఫర్ ఫన్ కార్యక్రమంలో ఇరువురు ముఖ్య అతిథిలుగా పాల్గొని ఆనందంగా తిలకించారు. ఈ సందర్భంగా గాజువాక ఎంఈవో ఎం.సునిత మాట్లాడుతూ ప్రస్తుత విద్యా విధానంలో ఈ తరహా కార్యక్రమాలు చాలా అవసరమని అన్నారు. క్రీడలకు అధిక ప్రాధాన్యత ఇవ్వడం వలన మానసిక ఉల్లాసంతో చిన్నారులు ఆరోగ్యంగా ఉంటారన్నారు. ఇదే విధంగా అన్ని పాఠశాలల్లో వారానికి రెండు రోజులు చిన్నారులకు క్రీడల వైపు మళ్ళించాలని అభిప్రాయం వ్యక్తం చేశారు. మహారాణిపేట ఎంఈవో బి.పుష్య రాగం మాట్లాడుతూ స్కూల్‌ ఆఫ్‌ వండర్‌ కిడ్స్‌లో వినూత్న రీతిలో చదివించడంతో పాటుగా క్రీడా పరమైన అంశాల్లో ప్రత్యేక శ్రద్ధ చూపించడం అభినందనీయమని అన్నారు. కరాటీ, డాన్స్‌, చెస్‌ వంటి క్రీడల్లో ప్రత్యేక శిక్షణ ఇచ్చి చిన్నారుల అభ్యున్నతికి పునాదులు వేస్తున్న పాఠశాలగా వండర్‌ కిడ్స్‌ నిలుస్తుందన్నారు. ఈ సందర్భంగా పాఠశాల డైరక్టర్‌ మళ్ల రామునాయుడు మాట్లాడుతూ బాలల దినోత్సవం అనేది బాలలు ఇష్టపడే విధంగా ఉండాలని, వాళ్ళ ఇష్టానుగుణంగా ఈ రన్ ఫర్ ఫన్ కార్యాక్రమాన్ని ఏర్పాటు చేశామని పేర్కొన్నారు. ‘సరదా కోసం పరుగు’ పేరిట కార్యక్రమం నిర్వహించడం వలన చాలా ఉత్సాహంగా పాల్గొన్నారని వివరించారు. అనంతరం చిన్నారులకు పలు రకాల క్రీడల్లో పోటీలు నిర్వహించి ప్రతిభ కనబరిచిన విద్యార్థులకు బహుమతులతో పాటుగా పతకాలను అందించారు. కార్యక్రమంలో భాగంగా కేజీ విద్యార్థులు వేసిన నృత్యాలు అందర్నీ విశేషంగా ఆకట్టుకున్నాయి. పలువురు విద్యార్థులు కరాటీ క్రీడలో చేసిన సాహసాలు అబ్బురపరిచాయి. ముగింపు కార్యక్రమంలో పాల్గొన్న మరో ఇద్దరు ముఖ్య అతిథులు ఎంఈవోలు బి.పైడపునాయుడు, బి.విశ్వనాథం చిన్నారుల ప్రతిభకు మంత్రముగ్ధులై అభినందనల వెల్లువలు కురిపించారు. కార్యక్రమంలో రాష్ట్ర అపుస్మా మెంటర్‌ ఎ.కృష్ణారెడ్డి, కోశాధికారి ఎంవీ రావు, విశాఖ జిల్లా అపుస్మా అధ్యక్షులు ఎస్‌.శ్రీనివాసరావు, ప్రధాన కార్యదర్శి ఎంవీవీ సత్యనారాయణ, పాఠశాల ప్రిన్సిపల్‌ వాణిశ్రీ, ఉపాధ్యాయులు, విద్యార్థుల తల్లిదండ్రులు పాల్గొన్నారు.
నేత్ర న్యూస్, విశాఖపట్నం, (ప్రత్యేక ప్రతినిధి) : ప్రభుత్వం నుంచి పేదలకు అందిస్తున్న కోటా బియ్యం రూ.కోట్ల వ్యాపారాన్ని దాటేస్తుందని అనడంలో అతిశయోక్తి లేదు. పేదలకు అందకుండానే ఆమడ దూరంలో దళారుల చేతుల్లోకి వెళ్లిపోతున్నాయి. బియ్యం పంపిణీ విషయమై డీలర్‌ వద్ద అక్రమాలు జరుగుతున్నాయని రాష్ట్ర ప్రభుత్వం ప్రతిష్టాత్మకంగా తీసుకొని ఇంటి వద్దనే ఇచ్చే విధంగా మొబైల్‌ పంపిణీ యూనిట్‌ (ఎండీయూ) వాహనాలను ప్రారంభిస్తే.. మొబైల్‌ పంపిణీ యూనిట్‌ సిబ్బంది డీలర్‌ల స్థాయిని సైతం మించిపోతున్నారని ఇప్పటికే రాష్ట్ర వ్యాప్తంగా వ్యతిరేకత వినిపిస్తుంది. ఈ క్రమంలో ప్రతీ నెల పేద ప్రజలకు బియ్యం ఇవ్వల్సింది పోయి వారికి బియ్యానికి బదులు కేజీకి రూ.10 చొప్పున సొమ్ము ఇస్తున్నారు. కొందరు మాత్రం బియ్యం కావాలని పట్టు పట్టి కూర్చుంటే రేపు రావాలి.. మరుసటి రోజు రావాలి.. అనే నెపంతో ఇబ్బందులకు గురిచేస్తున్నారని ఇప్పటికే పలువురు ప్రజలు మండి పడుతున్నారు. ఉచితంగా ఇచ్చే బియ్యం వద్ద రూ.10 వస్తుందని ప్రజలు తీసుకుంటున్నారు కానీ తద్వార ప్రభుత్వానికి ఎంత మొత్తంలో గండి కొడుతున్నామని ఏ ఒక్కరూ ఆలోచించకపోవడం శోచనీయం. నాడు డీలర్‌ల నుంచి వందల టన్నుల్లో బియ్యం పక్కదారి పడితే నేడు వేల టన్నుల్లో మాయమైపోతున్నాయి. దీనికి తోడు ప్రతీ అంశంలో ప్రభుత్వ అధికారుల మాదిరి లంచం తినడంలో మొదటి వరసలో ఈ ఎండీయూల సిబ్బంది ఉన్నారు.
నేత్ర న్యూస్, విశాఖపట్నం, (ప్రత్యేక ప్రతినిధి) : విశాఖ నగరాన్ని ప్లాస్టిక్‌ రహిత నగరంగా చూడాలని జీవీఎంసీ ఉన్నతాధికారులు చేస్తున్న ప్రయత్నం పక్కదారి పడుతుంది. 120మైక్రాన్‌ కంటే తక్కువగా మైక్రాన్‌లు ఉన్న ప్లాస్టిక్‌ సంచులతో పాటుగా ఒక్కసారి ఉపయోంగించే ప్లాస్టిక్‌ వస్తువుల వినియోగాన్ని సైతం పూర్తి స్థాయిలో అరికట్టాలని ప్రారంభించిన ప్రయత్నాలు పలు విమర్శలకు దారి తీస్తుంది. గత నెల ప్రారంభంలో సుమారు రూ.2కోట్లు వరకు ఖర్చు చేసి పది ఇసుజు డీ-మ్యాక్స్‌ జీవీఎంసీ ఎన్‌ఫోర్స్‌మెంట్‌ వాహనాలను ప్రారంభించిన ఉన్నతాధికారులు ముందుగా పలు జాగ్రత్తలు తీసుకోకపోవడంతో ఇప్పుడు నగరంలో పరువు తీసుకుంటున్నారు. దీనికి తోడు నెలవారీ ఒక్కొక్క వాహనానికి 140లీటర్లు డీజిల్‌ చొప్పున పది వాహనాలకు 1400 లీటర్లు డీజీల్‌కు గాను రూ.1,37,620లను, గౌరవ వేతనం చొప్పున ఒక్కొక్క వాలంటీర్‌కి రూ.10వేలు చొప్పున 36మందికి రూ.3.60లక్షలను ఖర్చు చేయడం అయోమయానికి గురి చేస్తుంది. వార్డు వాలంటీర్‌కి ఇచ్చిన రూ.5వేలు గౌరవ వేతనంతో పాటుగా అదనంగా రూ.10వేలు చొప్పున చెల్లించినా సంబంధిత వాలంటీర్‌లు వార్డుల్లో చేతివాటం చూపించడంతో పలువురు వ్యాపారుల నుంచి వ్యతిరేకత వినిపిస్తుంది.
దుకాణాల వద్దకు తనిఖీకి వెళ్తున్న ఎన్‌ఫోర్స్‌మెంట్‌ బృంద సభ్యులు ఇష్టానుసారంగా మాట్లాడటంతో పాటుగా అక్రమ మార్గంలో వసూళ్లకు పాల్పడతున్నట్టు పలువురు దుకాణదారులు వెల్లడిస్తున్నారు. అసలు ఈ బృందాలు నగరంలో గల మార్కెట్‌లు, దుకాణాలు, షాపింగ్‌ మాల్స్‌, చిరు వ్యాపారాలు, తోపుడు బండ్ల వద్ద ఉపయోగించే ప్లాస్టిక్‌ సంచులను ఉపయోగించకుండా చూడటం, వాళ్లకు అవగాహన పరచడం, ఉన్నతాధికారుల ఆదేశాల మేరకు జరిమానాలు విధించడం వంటివి చేయాలి. కానీ ఈ బృందాలు చిరు వ్యాపారులకు ఇష్టానుసారంగా జరిమానాలు విధించడంతో పాటుగా ఆమ్యామ్యాలపై మక్కువ చూపిస్తూ పక్కదారి పట్టడంతో నగర ప్రజల నుంచి జీవీఎంసీ అధికారులపై తీవ్ర స్థాయిలో విమర్శలు వెల్లువెత్తుతున్నాయి.
నేత్ర న్యూస్, విశాఖపట్నం, (ప్రత్యేక ప్రతినిధి) : పేద ప్రజలకు అందించాల్సిన పీడీఎస్ రైస్‌ పక్కదారి పట్టడానికి ప్రభుత్వ అధికారులే కీలకంగా వ్యవరిస్తున్నారని ఒకటి రెండు ఘటనలు పరిశీలిస్తే ఇట్టే అర్థం అయిపోతుంది. నెల చివరిలో వచ్చే జీతాలు కంటే నెలవారీ వస్తున్న మామ్మూళ్లు మత్తులో అధికారులు విధులు నిర్వహించడంతో పేదల బియ్యం పక్కదారి పడుతుంది. పీడీఎస్ రైస్‌ని అక్రమంగా తరలిస్తున్నారని సమాచారం అందుకున్న అధికారులు అందినకాడికి దోచుకోని వదిలేయడంతో ఓ ఫిర్యాదు దారుడు జిల్లా అధికారికి సైతం ఫిర్యాదు అందించడానికి సిద్ధమయ్యాడంటే దిగువ స్థాయిలో సిబ్బంది చేస్తున్న చేష్టలు హద్దులు మీరుతున్నాయనే చెప్పాలి. గురువారం రాత్రి సుమారు10.50గంటల సమయంలో అరిశెట్టి మహేశ్వరరావు అనే వ్యాపారి అల్లిపురం బజారు ప్రాంతంలో 750కేజీల పీడీఎస్ రైస్‌ని ఆటోలో అక్రమంగా తరలిస్తున్న సమాచారం అందుకున్న ఓ సర్కిల్‌-1 ఆర్‌ఐ రూ.20వేలు లంచం తీసుకొని అక్కడ నుంచి వెళ్లిపోవడం అందర్నీ ఆశ్చర్యానికి గురిచేసింది. ఇదే క్రమంలో సర్కిల్‌-3 పరిధిలో విధులు నిర్వహిస్తున్న మరో ఆర్‌ఐ ఓ పీడీఎస్ రైస్‌ వ్యాపారిపై దాడులు నిర్వహించి రూ.15వేలు, ఓ మిల్లు యజమాని నుంచి ఇంకొక ఆర్‌ఐ రూ.15వేలు తీసుకోవడం అధికారుల పనితీరు కోసం ప్రత్యేకంగా చెప్పనవసరం లేదనే చెప్పాలి.
నేత్ర న్యూస్, విశాఖపట్నం : జీవీఎంసీకి రూ.కోట్ల ఆదాయాన్ని అందించే ప్రధాన ఆస్తుల్లో పూర్ణా మార్కెట్‌ (సర్ధార్‌ వల్లభాయ్‌ పటేల్‌ మార్కెట్‌) ఒక్కటిగా నిలవడం అందరికీ తెలిసిన విషయమే.. అటువంటి మార్కెట్‌ను రూ.లక్షలకే అప్పనంగా అంటగట్టడానికి చేసిన ప్రయత్నాలు ఫలించాయని అందరూ అనుకుంటున్నారు. ఏడాదికి ఓ బినామీని వేలం పాటలో నిలబెట్టిన ఓ రింగ్‌ మాస్టార్‌ ఒకవైపు.. గత కొన్నేళ్లుగా డమ్మీ డీడీలను చెల్లించి పాటలో హడావుడి చేసి ఒక్క రోజులో రూ.లక్షల లాభంతో పక్కదారి పట్టించే డమ్మీ గుత్తేదారుడు మరోవైపు.. ఆడిన రింగులాటకు జీవీఎంసీ అధికారుల సైతం కంగు తిన్నారంటే ఆశ్చర్య పడనవసరం లేదు. ప్రతీ ఏడాది జీఎస్‌టీతో కలుపుతూ రూ.కోటికి పైగా ఆదాయాన్ని అందించే పూర్ణామార్కెట్ ఈ ఏడాది జీఎస్‌టీతో కలిపినా గత పదేళ్లలో సర్కారు వారి పాట మొత్తానికి సైతం సరి తూగడానికి వీలు లేని విధంగా రూ.74.44లక్షలకు రింగు అయిపోయి జీవీఎంసీ ఆదాయాన్ని పక్కదారి పట్టించారని స్పష్టంగా కనిపిస్తుంది. పూర్ణామార్కెట్ ఆశీలకు సంబంధించి బహిరంగ వేలం పాటను నిర్వహిస్తున్నామని ప్రకటించగానే ఓ డమ్మీ గుత్తేదారుడు బ్యాంక్‌కు నేరుగా వెళ్లి డీడీలు చెల్లించి పాటలో కూర్చొని ఎదుట గుత్తేదారుడితో ముందుగా రింగు అయిపోయి రూ.లక్షలతో ఉన్న బ్యాగ్‌ను తీసుకొని వెళ్లిపోయే తీరు ఒకటైతే.. ప్రతీ ఏడాది ఓ కొత్త వ్యక్తిని రంగంలోకి దింపి పాటను కైవసం చేసుకున్న గుత్తేదారుడి తీరు మరొకటి. ఈ క్రమంలో గత ఏడాది 2022-23 ఆర్థిక సంవత్సరంలో సుమారు రూ.45లక్షలు చెల్లించి బ్యాంక్‌ గ్యారెంటీ ఇవ్వలేదని రెండు నెలల పది రోజులకే శుభం కార్డుతో పక్కకు వచ్చేసిన బృందం ఈ ఏడాది ఎందుకు పాటకు రాలేదని ఆలోచిస్తే.. గత ఏడాది నష్టపోయిన సొమ్ము ఈ గుత్తేదారుడి వద్ద వసూలు చేసుకొని లాభం పొందడానికి ప్రణాళిక సిద్ధం చేసుకున్నారని అక్కడ ఎంతగా రింగులు తిప్పారో చెప్పడానికి మాటలు సరిపోవడం లేదంటే అతిశయోక్తి కాదనే చెప్పాలి. రూ.60లక్షలకు సర్కార్‌ వారి పాటను ప్రారంభిస్తే రూ.పది వేల చొప్పున పెంచుతూ రూ.62.40లకు వచ్చిన గుత్తేదారులు జీవీఎంసీ అధికారులు అంగీకరించక పోవడంతో పాటను రూ.5వేల చొప్పున పెంచుతూ రూ.62.50లకు చేర్చారు. అక్కడ నుంచి కొత్త నాటకానికి ఆరంభం పలికి రూ.వెయ్యి చొప్పున పెంచుతూ రూ.62.55లపై రూ.1వెయ్యి అదనంగా వేసి రూ.62.56కి పాటను కైవసం చేసుకోవడం ఆస్కార్‌ నటనకు అద్దం పట్టినట్టు కనిపించింది. రూ.62.55లక్షలను చెల్లించడానికి సిద్ధమైన గుత్తేదారుడు వెయ్యి రూపాయల తేడాతో ఎదుట గుత్తేదారుడికి పాటను వదిలి పెట్టడం వెనుక రింగులాట ఎంత చక్కగా ఆడారో ఇట్టే అర్థం అయిపోతుంది.
నేత్ర న్యూస్, విశాఖపట్నం : ఈ నెల 28, 29 తేదీలలో జరుగనున్న జి-20 సదస్సు కార్యక్రమానికి దేశవిదేశాల నుంచి విశాఖ నగరానికి విచ్చేస్తున్న ప్రతినిధులను, అతిధులను ఆకట్టుకునేలా విశాఖ నగరాన్ని సుందరీకరణ పనులను మున్సిపల్ శాఖ మంత్రి ఆదిమూలపు సురేష్, స్పెషల్ చీఫ్ సెక్రటరీ శ్రీలక్ష్మి, జీవీఎంసీ కమిషనర్ పి.రాజబాబు, డిప్యూటీ మేయర్ జియ్యని శ్రీధర్, అధికారులు తో కలిసి మేయర్ గొలగాని హరి వెంకట్ కుమారి పర్యటించి పరిశీలించారు. దీనిలో భాగంగా మాధవధారలో ఉన్న పంప్ హౌస్ కు చేరుకొని దీని ద్వారా 24/7 నీటి సరఫరా ఆ ప్రాంత ప్రజలకు నిరాటంకంగా అందించడం జరుగుతుందని, నీటి సరఫరాలో ఎక్కడ అంతరాయాలు లేకుండా వున్నాయని, ఎలక్ట్రికల్ సిస్టం ద్వారా లైన్ లోకి వెళ్లకుండానే తాగునీరు ఆపే విధానం తోపాటు ఎక్కడైనా లేఖలు ఉన్నట్లయితే త్రాగునీటి వృధా అవకుండా సిస్టం ద్వారా తెలుసుకొని అరికట్టవచ్చని ఈ పంప్ హౌస్ ఎ.డి.బి. నిధులతో ఏర్పాటు చేయడమైనదని, పవర్ పాయింట్ ప్రజెంటేషన్ ద్వారా అధికారులు వారికి వివరించి ఏర్పాట్లు చేస్తున్నామని మంత్రి ఆదిమూలపు సురేష్ కు తెలిపారు. అనంతరం మూఢసరలోవ రిజర్వేయర్ లో ఉన్న సోలార్ ప్రాజెక్ట్ లను ఏర్పాటు చేసి, విద్యుత్ ను ఆదా చేయడమే కాకుండా, కాలుష్యాన్ని నివారిస్తూ, ఆర్ధిక లాభం జివిఎంసి పొందుతుందన్నారు. 24 గంటలు ప్రజలకు మంచి నీటి సరఫారాను అందించడం జరుగుతుందన్నారు. వేస్ట్ వాటర్ ను రీసైక్లింగ్ చేయడం ద్వారా వచ్చిన మంచి నీటిని నగరంలో గల పరిశ్రమలకు సరఫరా చేయడం ద్వారా జివిఎంసి కు ఆదాయం చేకూరుతుంది అని మంత్రి ఆదిమలకు సురేష్ కు అధికారులు వివరించారు. జి.20 సంబంధించి అభివృద్ధి పనులను, సుందరీకరణ పనులను ఆయన పరిశీలించి త్వరితగతిన పూర్తి చెయ్యాలని అధికారులను ఆదేశించారు. విశాఖ నగరాన్ని టాప్ -10 సిటీలలో ఒక సిటీగా ఉండేటట్లు తీర్చిదిద్దేందుకు రాష్ట్ర ముఖ్యమంత్రి వైఎస్ జగన్మోహన్ రెడ్డి సంకల్పమని, ఆయన ఆదేశాల మేరకు విశాఖ నగరాన్ని మరింత సుందర నగరంగా అభివృద్ధి చేయడంతో పాటు పరిపాలన రాజధానిగా తీర్చిదిద్దాలనే స్థాయికి విశాఖ నగరం ముస్తాబ్ అవుతుందని తెలిపారు.
అనంతరం సీత కొండ బీచ్ వద్ద వ్యూ పాయింట్ ను పరిశీలించారు ఈ వ్యూ పాయింట్ను డాక్టర్ వైఎస్ఆర్ వ్యూ పాయింట్గా (సీతకొండ) దగ్గర అనే నామకరణం చేసేందుకు ప్రతిపాదనలను మంత్రి ఆదిమలకు సురేష్, గుడివాడ అమర్నాథ్ కు తెలియజేశారు. ఈ సదస్సు నిర్వహణ ఏర్పాట్లను పరిశీలించే చర్యలు చేపట్టాలని అధికారులకు ఆదేశించారు. ఈ కార్యక్రమంలో వార్డ్ కార్పొరేటర్లు రొయ్యి వెంకటరమణ, కె స్వాతి, అధికారులు తదితరులు పాల్గొన్నారు.
నేత్ర న్యూస్, విశాఖపట్నం : హస్తకళలను ప్రోత్సాహించాలని జిల్లా జాయింట్ కలెక్టర్ కెయస్ విశ్వనాథన్ పేర్కొన్నారు. మదురవాడలోని శిల్పారామంలో ఏర్పాటు చేసిన గాంధీ శిల్ప బజారు, కళాత్మక చేనేత వస్త్రముల ప్రదర్శన, అమ్మకాలను ఆయనతో పాటు ఆయన సతీమణి విశ్వాంజలి గైక్వాడ్ లు శుక్రవారం రాత్రి ప్రారంభించారు. ఈ సందర్భంగా ఆయన మాట్లాడుతూ ఈ నెల 23 నుండి ఏప్రిల్ 1వ తేదీ వరకు ఎగ్జిబిషన్ ఉంటుందని చెప్పారు. భారతదేశ కళలను సంరక్షించుటకు, కాపాడుటకు, అభివృద్ధి పరచుటకు సరియైన మార్కెటింగ్ సౌకర్యం కల్పించి, వాటి ఉన్నతికి హస్తకళాకారుల జీవన ప్రమాణాలను మెరుగుపరుచుటకు వారిని ప్రోత్సహించాలన్నారు. హస్త కళలను ప్రోత్సహిస్తూ వారి శ్రేయస్సు కొరకు వివిధ రకాల సంక్షేమ కార్యక్రమాలను ప్రభుత్వం అమలు చేస్తున్నట్లు తెలిపారు. దేశంలోగల వివిధ రాష్ట్రముల నుండి జాతీయ అవార్డులు, రాష్ట్ర ప్రభుత్వ అవార్డులు అనేక మంది చేతివృత్తి కళాకారులు తాము తయారుచేసిన వివిధ కళాఖండములను ఒకే వేదిక వద్దకు తీసుకువచ్చి పొందిన చేతితో తయారుచేయబడిన కళాఖండములను ప్రేమించి విశాఖ నగర పౌరులకు కళాకారులే తమ వస్తువులను నేరుగా అమ్ముకొను సౌకర్యమును కల్పించుటయే ఈ గాంధీ శిల్ప బజారు యొక్క ముఖ్య ఉద్దేశ్యమన్నారు.
ఈ ప్రదర్శనలో పాల్గొను కళాకారులు కొనుగోలు దారుల అభిరుచికి తగ్గ ప్రసిద్ధ డిజైన్లను ప్రస్తుత వ్యాపారానికి తగినట్లుగా తయారుచేసినట్లు వివరించారు. ఈ ప్రదర్శనలో సుమారు 100 నుండి 125 మందికి పైగా వివిధ రకాల చేతివృత్తుల కళాకారులు తమ వస్తువులను ప్రదర్శన, అమ్మకమునకు ఉంచబడినట్లు చెప్పారు. తెలుగు రాష్ట్రాల నుండి కలంకారి ప్రింటింగ్, పెయింటింగులు, కొండపల్లి బొమ్మలు, ఏటికొప్పాక బొమ్మలు, లేసు అల్లికలు, చెక్కతో తయారు కాబడిన వివిధ రకాల కళాకృతులు, టెర్రకోట పాటరీలు, తాటియాకులతో తయారు కాబడిన వస్తువులు, ఏలూరు తివాచీలు, కేన్ వస్తువులు, మంగళగిరి డ్రస్ మెటీరియల్స్, చీరాల చీరలు, హైదరాబాదు ముత్యాలు, నిజామాబాద్ మెమెంటోలు, బ్లాక్ మెటల్ వస్తువులు, ఉదయగిరి ఉడెన్ కట్లరీ వస్తువులు, నిర్మల్ పెయింటింగ్లు, తదితరమైనవి ఉన్నట్లు పేర్కొన్నారు.
ఇతర రాష్ట్రాలకు చెందిన ఎంబ్రాయిడరీ, గాజు ఆభరణములు, తివాచీలు, వివిధ ఆకృతుల లోహపు వస్తువులు, శిలలతో తయారుచేయబడిన కళాత్మక వస్తువులు, వివిధ రకాల ప్రింటింగ్ వస్త్రాలు, చిత్రపటాలు, సిల్వర్ ఫిలిగ్రీ, లడ్డు గాజులు, దోప్లేస్టింగ్లు, డ్రై ఫ్లవర్స్, కేన్ వస్తువులు, బాతిక్ పెయింటింగ్లు, ఉద్-ఇన్-లే వస్తువులు, తంజావూరు, మైసూరు పెయింటింగులు మొదలగునవి. ప్రదర్శన, అమ్మకమునకు ప్రరర్శించినట్లు చెప్పారు. ప్రదర్శన ప్రతిరోజూ ఉదయం 11 గంటలు నుండి రాత్రి 9 గంటల వరకు ఉంటాయని, శెలవు దినములలో కూడా తెరచి ఉంటాయన్నారు. ఈ ప్రదర్శన హస్తకళల అభివృద్ధి కమిషనర్ కార్యాలయములు, జౌళిశాఖ, కేంద్రప్రభుత్వం, న్యూఢిల్లీ వారి ఆర్థిక సహాయంతో ఆంధ్రప్రదేశ్ హస్తకళల అభివృద్ధి సంస్థ లిమిటెడ్ (ఆంధ్రప్రదేశ్ ప్రభుత్వ రంగ సంస్థ) లేపాక్షి హస్తకళల ఎంపోరియమ్, విశాఖపట్నం వారి సౌజన్యంతో నిర్వహించబడుచున్నదని తెలిపారు.
గాంధీ శిల్పబజూరు లేపాక్షి హస్తకళలు మరియు కళాత్మక చేనేత వస్త్రాల ప్రదర్శన మరియు అమ్మకమునకు వివిధ రాష్ట్రముల నుండి వచ్చిన కళాకారులు తాము తయారుచేసిన వస్తువులను నేరుగా అమ్ముకొనుటకు విస్తృత ప్రచారం గావించి వారికి చేయూత నివ్వవలసినదిగా కోరారు. కార్యక్రమంలో ఎపి హస్తకళల అభివృద్ధి సంస్థ ఛైర్మన్ బి. విజయలక్ష్మి, హస్తకళల అభివృద్ధి సంస్థ ఎగ్జిక్యూటివ్ డైరెక్టర్ విశ్వ మనోహర్, విశాఖ రూరల్ తహసీల్దార్ సనపల రమణయ్య, డిసి హెచ్ ఎడి అపర్ణ లక్ష్మి. యన్, హెచ్ పిఓ ఎం సువర్చల, లేపాక్షి మేనేజర్ కె. విజయ గౌరి, ఇన్ చార్జ్ మేనేజర్ బి. శైలజ రెడ్డి, తదితరులు పాల్గొన్నారు.
నేత్ర న్యూస్, విశాఖపట్నం : ఇంటి దొంగలను ఈశ్వరుడైన పట్టుకోలేడు.. అనే సామెత ఆంధ్ర విశ్వ విద్యాలయంలో విధులు నిర్వహిస్తున్న సెక్యూరిటీ గార్డులకు చక్కగా సరిపోతుంది. చాలా రోజులుగా ఆంధ్ర విశ్వకళాపరిషత్‌లో గంజాయి చలామణి అవుతుందని సంబంధిత ఉన్నతాధికారులకు పలు అనుమానాలు ఉన్నా అటుగా ఏ ఒక్క నిఘా అధికారి పట్టించుకోక పోవడంతో విద్యార్థులు గంజాయికి బానిసలై నిర్మాణుష ప్రాంతాల్లో గంజాయి సేవిస్తున్నారని గుర్తించారు. దీంతో పలు ఆధారాలు సేకరించి సాక్షాత్తు ఏయూ వీసీ నగర పోలీసు కమిషనర్, టాస్క్‌ఫోర్స్‌తో పాటుగా త్రీటౌన్‌ పోలీసులకు సమాచారం అందించారని విశ్వసనీయ సమాచారం. దీంతో నగర టాస్క్‌ఫోర్స్‌ పోలీసులు నాలుగు రోజులు అటుగా నక్కుతూ నిఘా కట్టుదిట్టం చేయడంతో కంగుతిన్న నిజాలు తేటతెల్లమయ్యాయి. ఏయూలో రోజువారీ విద్యార్థులకు గంజాయి అందుతున్న మార్గాలను, విక్రయించే వ్యక్తులను గుర్తించి శుక్రవారం ముగ్గురు నిందితులను అదుపులోకి తీసుకున్నారు. అక్కడితో కథ సుఖాంతం అయిపోయిందని అనుకుంటున్నారా..? అసలు కథ అక్కడే మొదలైయిందని పోలీసులు గుర్తించారు. విద్యార్థులకు గంజాయిని విక్రయిస్తున్న వ్యక్తులు బయట నుంచి ఏయూ లోపలికి చొరబడి విక్రయించడం లేదని, విశ్వ విద్యాలయం గేటు వద్ద ఉన్న వ్యక్తులే విక్రయిస్తున్నట్టు గుర్తించారు. అంటే అక్కడే అసలు విషయం స్పష్టంగా అర్థం అయిపోతుంది. గేటు వద్ద ఉన్న సెక్యూరిటీ గార్డులే ఆ విక్రయాలు చేస్తున్నట్టు తెలుసుకొని టాస్క్‌ఫోర్స్‌ సిబ్బంది వల వెయ్యడంతో ఏకంగా ముగ్గురు సెక్యూరిటీ గార్డులు అరకేజీ గంజాయితో రెడ్‌ హ్యాండెడ్‌గా దొరికిపోయారు. దీంతో సంబంధిత ఉన్నతాధికారులకు సమాచారం అందించి స్థానిక త్రీటౌన్‌ పోలీసు స్టేషన్‌కి అప్పగించడంతో కేసు నమోదు చేసి పెద్దగదిలి, సింహగిరి కాలానీలో నివసిస్తున్న టెంటు చంద్రమోళి(29), ఎంవీపీకాలానీ, శివాజీపాలెంలో నివసిస్తున్న సిత అప్పలరాజు(42), రాజీవ్‌ నగర్‌లో ఉంటున్న పిల్లా ఉదయ్‌ సురేష్(30)ని రిమాండ్‌కి తరలించినట్టు సంబంధిత ఎస్సై తెలిపారు. ఆ సమయంలో పోలీసుల నుంచి పరార్‌ అయిన మరో నిందితుడు పి.సంతోష్‌ని సైతం అదుపులోకి తీసుకున్నామని వివరించారు. దీనిపై విచారణ ప్రారంభించగా గంజాయిని సరఫరా చేస్తున్న మరో ముగ్గురు నిందితులు పి.మోహన్‌ సాయి(23), బి.సతీష్‌(25), జి.గోవింద్‌(30)ని అదుపులోకి తీసుకొని విచారిస్తున్నట్టు సమాచారం.
విశ్వ విద్యాలయంలో ఎటువంటి అవాంచనీయ ఘటనలు జరగకుండా నలుదిక్కుల కాపలా కాయవల్సిన కాపాలదారులే కపట ఆలోచనలకు ఆజ్యం పొయ్యడంపై సర్వత్ర విమర్శలు వినిపిస్తున్నాయి. నేరుగా సెక్యూరిటీ గార్డులే విద్యార్థులకు మత్తు పదర్థాలను విక్రయిస్తూ దొరికిపోవడంపై విద్యార్థుల తల్లిదండ్రులు సంబంధిత యాజమాన్యాలపై మండిపాటు చూపిస్తున్నారు. ఇప్పటికే పలుమార్లు మద్యం సేవించడం, డ్రగ్స్‌ వినియోగం, ఆసాంఘిక కార్యక్రమాలు వంటి ఘటనలు జరిగి ఏయూ పరువు పోయిన పరిస్థితులు ఉన్నా ఈసారి ఏకంగా రక్షణ కాయవల్సిన సెక్యూరిటీ గార్డులే విద్యార్థులకు గంజాయిని విక్రయించడం విస్మయానికి గురిచేస్తుంది.
విశ్వ విద్యాలయంలో తన సిబ్బందితో పాటుగా విద్యార్థుల అడుగుజాడలను నిత్యం కనిపెడుతూ ఎటువంటి అవాంచనీయ ఘటనలు జరగకుండా చూడాల్సిన సెక్యూరిటీ వ్యవహారాల పర్యవేక్షక ఉన్నతాధికారి నిఘా శూన్యంగా కనిపిస్తుంది. ఆయన గతంలో నగరంలో అడిషనల్‌ ఎస్పీ స్థాయిలో విధులు నిర్వహించి పదవీ విరమణ అనంతరం ఏయూలో ఓ ప్రత్యేక స్థానాన్ని తన కోసం సృష్టించి ఉద్యోగంలో చేరారని ఆనోట.. ఈనోట.. గుస గుసలు గట్టిగానే వినిపించాయి. ప్రభుత్వంలో కీలక వ్యక్తి పైరవీలతో లేని పోస్టులను సైతం సృష్టించి భారీ జీతం ఇవ్వడం ప్రారంభించిన విషయం అందరికీ విధితమే.. కానీ అక్కడ అంత మొత్తంలో జీతం తీసుకొని తన వద్ద డ్రైవర్‌గా విధులు నిర్వహిస్తున్న సెక్యూరిటీ గార్డ్‌ టెంటు చంద్రమోళి(29) సైతం గంజాయి విక్రయిస్తూ పట్టుబడటంపై ఆయన విధి నిర్వహణ ఇట్టే అర్థం అయిపోతుంది. గతంలో అడిషనల్‌ ఎస్పీ స్థాయిలో విధులు నిర్వహించిన పనితీరు కాసంత కూడా ఇక్కడ చూపించకుండా ఏయూ సెక్యూరిటీ వ్యవహారాల పర్యావేక్షక అధికారి హోదాను, ఓ సఫారీ కారుని, తన రక్షణకు నలుగురు గార్డులతో పాటుగా పలు సేవలను ఏ విధంగా అనుభవిస్తున్నారో సంబంధిత అధికారులే వెల్లడిరచాలి. ఆయన పర్యావేక్షణలో ఉన్న ముగ్గురు నిందితుల్లో ఒకడైన చంద్రమోళి గతంలో రాత్రి గస్తీ నిర్వహించి మహిళా విద్యార్థులపై అసభ్యకరంగా ప్రవర్తించడం, ఇంజనీరింగ్‌ విద్యార్థులు మద్యం సేవిస్తున్నారని గుర్తించి వాళ్లను బెధిరించి డబ్బులు గుంజుకోవడం వంటి విషయాలు తెలిసినా విధుల్లో కొనసాగించడంపై ఉన్నతాధికారుల పర్యావేక్షణ ఏ విధంగా ఉందో ప్రత్యేకంగా చెప్పనవసరం లేదు.
విశ్వంలో ఆంధ్ర విశ్వవిద్యాలయానికి ఉన్న పరువు ప్రతిష్టలు బుగ్గిపాలు అవుతున్నా సంబంధిత ఉన్నతాధికారులు అటుగా పట్టించుకోకపోవడంపై పలు వర్గాల నుంచి విమర్శలు వినిపిస్తున్నాయి. గతంలో విద్యార్థులు మద్యం సేవించడం, అసాంఘిక కార్యక్రమాలు, మాదక ద్రవ్యాలు ఉపయోగంచడం వంటి ఘటనలు జరుగుతున్నాయని గుర్తించి చర్యలు తీసుకున్నా తాజా సంఘటన మరోమారు ఉలిక్కి పడే విధంగా చేసిందనే చెప్పాలి. కాపాల కాసే సెక్యూరిటీ గార్డులే గంజాయి వంటి మత్తు పదర్థాలను విక్రయిస్తూ రెడ్‌హ్యాండెడ్‌గా పట్టుబడటం మరోమారు ఏయూ పరువు పోయిందనే చెప్పాలి. ఏస్‌ఈబీ, టస్క్‌ఫోర్స్‌ బృందాలు జాయింట్ ఆఫరేషన్‌ని నిర్విహించి ఈ వ్యవహారాన్ని బయట పెట్టినా మీడియాకు రెండు రోజుల తరువాత తెలియడం ఆలోచించాల్సిన విషయం..? మీడియా ముందు గుట్టుగా ఉన్న ఉన్నతాధికారులు తమ గుమ్మంలో జరుగుతున్న వ్యవహారాలను పట్టించుకోవడంలో ఎందుకు నీరు కారుతున్నారో అని పలు వర్గాలు ప్రశ్నిస్తునే ఉన్నాయి. అంగులు ఆర్భాటాలకు పోయి ఎప్పుడూ లేని సెక్యూరిటీ ఆఫీషర్‌ స్థాయిని కేటాయించి భారీ మొత్తంలో జీతాలను, కారులను, వ్యక్తిగత రక్షణ సిబ్బందిని కేటాయిస్తున్న సమయంలో సైతం ఈ ఘటనలు బయట పడటం విశ్వ విద్యాలయం పరువు బుగ్గిపాలు చేస్తున్నట్టే అని పలువురు విద్యార్థి నాయకులు అభిప్రాయం వ్యక్తం చేస్తున్నారు.
బాల్యాన్ని సక్రమమైన పద్ధతిలో మలుచుకుంటే బంగారు భవిత సొంతమవుతుందని అక్కడి ఉపాధ్యాయుల దృఢ నమ్మకం. అదే మార్గాన్ని అక్కడ అందిపుచ్చుకోవడంతో ఆ విద్యార్ధులకు విజయావకాశాలు పుష్కలంగా అందుతున్నాయి. విద్యా వ్యవస్థలో ఉండే లోటు పాట్లును ప్రయోగాత్మకమైన పద్ధతిలోకి తీసుకొచ్చి ఫలితాలను చూసిన స్కూల్‌ ఆఫ్‌ వండర్‌ కిడ్స్‌ డైరక్టర్‌ మళ్ల రామునాయుడు చేసిన ఓ చిన్న ప్రయత్నం పెద్ద వృక్షమై ఇప్పుడు తియ్యని ఫలాలనందిస్తుందని ఆ పాఠశాల విద్యార్థుల తల్లిదండ్రులు హర్షం వ్యక్తం చేస్తున్నారు. ప్రస్తుత విద్యా వ్యవస్థలో మార్పులకు అనుగుణంగా విద్యాబోధన అందిస్తునే తమదైన పద్ధతిలో మెలుకువలు నేర్పించడంతో స్కూల్‌ ఆఫ్‌ వండర్‌ కిడ్స్‌లో చిన్నారులు వండర్స్‌ సృష్టిస్తున్నారు. చిట్టి పొట్టి చిన్నారులకు పుస్తకాలతో ఒత్తిడి ఉండకూడదని, ఆడుకునే వయసులో ఆట బొమ్మలు తప్ప పుస్తకాల బరువులు తెలియకూడదని ఆయన దృఢంగా నమ్మారు. సరికొత్త ఆలోచనతో ప్రారంభించిన ప్రయోగంలో మొదట ఒడుదుడుకులు వచ్చినా ఎట్టకేలకు విజయతీరాలను చేరుకొని వందలాది రికార్డులను కైవసం చేసుకున్నారంటే అతిశయోక్తి కాదు. ఓ పాఠశాలలో ఉపాధ్యాయునిగా పనిచేస్తూ అక్కడి విద్యార్థులపై చేసిన ప్రయోగం నేటికి వదిలి పెట్టలేదనే చెప్పాలి. అక్కడి చేసిన మొదటి ప్రయత్నంలో చిరు సమస్యలు వచ్చినా పట్టు వదలని విక్రమార్కుడిలా ఆ ప్రయోగాన్ని పట్టి పట్టి ప్రయత్నించడంతో అద్భుతాలు సృష్టించిన వ్యక్తిగా నిలిచారు. ఆ తరువాత 2001లో స్కూల్‌ ఆఫ్‌ వండర్‌ కిడ్స్‌ పేరిట ఓ ప్రయోగశాలనే ప్రారంభించారు. తమ వద్దకు వస్తున్న చిట్టి పొట్టి చిన్నారుల చేతుల్లో బొమ్మలు మాత్రమే చూడాలని, పుస్తకాలను అప్పుడే చూడకూడదని నిర్ణయించుకొని ప్రయోగాలను కొనసాగించారు. త్వరలో దేశమంతట ఉపయోగించనున్న నూతన విద్యా విధానాల అనుగుణ పద్ధతులను 2001లోనే ప్రారంభించి నేటికి 130కి పైగా రికార్డులను కైవసం చేసుకొని దేశ నలుమూలలకు చాటి చెప్పారు. కేజీ నుంచి ఆపై తరగతులు చిన్నారులకు చెప్పే ఉపాధ్యాయులకు కూడా ఇక్కడ ప్రత్యేక తరగతులు ఉంటాయంటే ఆశ్చర్య పడనవసరం లేదు. ప్రతీ అంశంలో ఓ కొత్త పద్ధతిని ప్రయోగించడంలో ఈ పాఠశాలకే దక్కిందని చెప్పాలి. నర్సరీ, ఎల్‌కేజీ, యూకేజీలకు పుస్తకాలు లేకుండా చెప్పే విధానంలో ఓ వింత సైతం దాగి ఉందని చెప్పడానికి యూకేజీ ఆఖరి రోజుల్లో ఆ చిన్నారులు ఆంగ్ల పత్రికలు సరళమైన పద్ధతిలో చదవి వినిపించడమే.. తరగతుల వారీగా ఉపాధ్యాయులు సోపానాలను వెయ్యడంతో అక్కడి చిన్నారులు విద్యార్థి దశను విజయాల దిశగా మలుచు కుంటున్నారు. జిల్లా స్థాయిలో ప్రారంభించి రాష్ట్రాలకు తమ పాఠశాల ఉనికి తీసుకెళ్లడంతో పాటుగా దేశ ప్రథమ పౌరుడితో ప్రశంసలందుకున్నారంటే వండర్స్‌ సృష్టిస్తున్న ఈ కిడ్స్‌ చేస్తున్న వండర్స్‌ ప్రత్యేకంగా చెప్పనవసరం లేదు. నేటికీ విజయవకాశాలను అందుకుంటున్న స్కూల్‌ ఆఫ్‌ వండర్‌ కిడ్స్‌ని ఓసారి చుట్టి వద్దాం పదండీ..!
స్కూల్‌ ఆఫ్‌ వండర్‌ కిడ్స్‌.. ఈ పదం పాఠశాల కంటే ప్రయోగశాలగానే అందరికీ సుపరిచితం. రికార్డులకు రుజువైన మార్గాన్ని చూపించే ఓ విద్యాలయంగా ఇప్పటికే వందలాది రికార్డులను కైవసం చేసుకొని ప్రథమ స్థానంలో నిలిచింది. స్నేహపూర్వక, ఉల్లాసభరితమైన వాతావరణంలో విద్యార్థుల బల, బలహీనతలను విశ్లేషించి అత్యుత్తమమైన విద్యను అందించడమే లక్ష్యంగా ముందుకు సాగుతుంది ఈ స్కూల్‌ ఆఫ్‌ వండర్‌ కిడ్స్‌. తమ పిల్లలపై చేసిన ప్రయోగమే పాఠశాలని ప్రయోగశాలగా మార్చడానికి కారణమని డైరక్టర్‌ మళ్ల రామునాయుడు మాటల్లో పలుమార్లు వెల్లడిరచారు. తమ పెద్ద కుమార్తె రజితపై ఈ తరహా విద్యా విధానాన్ని ప్రయోగించడంతో 1996లో హెచ్‌ఆర్‌డీ మంత్రి ఎస్‌.ఆర్‌.బొమ్మై చేతుల మీదుగా జాతీయ బాలల అవార్డును ఆరేళ్ల ప్రాయంలో గెలుచుకున్నారంటే ఆయన చేసిన ప్రయోగ స్థాయికి వందలాది రికార్డులు అద్ధం పడుతున్నాయని చెప్పాలి. నాటి నుంచి ఆ మార్గంలో విద్యార్థులకు కొత్త కొత్త మెలుకువలు నేర్పిస్తూ విద్యావంతులుగా చేస్తున్నారు.
స్కూల్‌ ఆఫ్‌ వండర్‌ కిడ్స్‌లో విద్యార్థులకు విద్యను నేర్పించడం ఎంతటి బాధ్యతగా స్వీకరిస్తామో నైతిక విలువలకు సైతం ప్రాధాన్యత ఇచ్చే విధంగా విద్యార్థులను తయారుచేస్తాం. ఉపాధి సంపాధించడం కంటే సమాజంలో ఉత్తమంగా ఉండే విధంగా తయారు చేసి ఉద్యోగాలు ఇచ్చే స్థాయిలో విద్యార్థులను నిలబెడతాం. ఒక రూపాయిని సక్రమమైన మార్గంలో సంపాధించడంతో పాటుగా ఆ రూపాయిని అదే మార్గంలో ఖర్చు చేసే విధానం సైతం నేర్పించడం మా ప్రత్యేకత. మారుతున్న కాలంలో తల్లిదండ్రులు పడుతున్న కష్టాలను పూర్తి స్థాయిలో అరికట్టే విధంగా విద్యార్థులకు నైతిక విలువలకు ప్రాధాన్యత ఇచ్చే విధంగా చేస్తాం. – మళ్ల రామునాయుడు, వాణిశ్రీ (స్కూల్‌ ఆఫ్‌ వండర్‌ కిడ్స్‌ డైరక్టర్‌, ప్రిన్సిపల్‌).
నేత్ర న్యూస్, విశాఖపట్నం: జీవీఎంసీ జోన్‌-4లో పట్టణ ప్రణాళిక కార్యదర్శిలు చేతివాటం చూపిస్తూ చెలరేగిపోతున్నారు. తాము చేసిందే చట్టంగా వార్డు స్థాయిలో ఇష్టానుసారంగా వ్యవరిస్తున్నారు. గతంలో చైన్‌మాన్‌లు చేసిన అవినీతికి ఏ మాత్రం తగ్గకుండా జోన్‌-4 టౌన్‌ ప్లానింగ్‌ పరువుని నిలబెడుతున్నారు. ఇన్‌ఛార్జీ ఏసీపీ, టీపీవోగా వ్యవరిస్తున్న అధికారి, తన కింద టీపీఎస్‌ స్థాయి సిబ్బంది సైతం ఉన్నా ఇటుగా ఒక్కసారి కూడా తొంగి చూడలేదంటే భవన యజమానులు అక్కడికి ఎన్ని ముడుపులు పంపించారో ప్రత్యేకంగా చెప్పనవసరం లేదు. అనుమతులు లేకుంటే విద్యుత్తు, మంచి నీరు వంటి సధుపాయాలు ఇవ్వడం కుదరదని జీవీఎంసీ కమిషనర్ ఇప్పటికే ప్రకంటించినా అటుగా ఏ ఒక్కరూ పట్టించుకోక పోవడంపై సర్వత్ర విమర్శలు జోరుగా వినిపిస్తున్నాయి. దిగువ స్థాయిలో విధులు నిర్వహిస్తున్న కార్యదర్శిలు రూ.లక్షలకు కక్కుర్తి పడి భవన యజమానులకు వత్తాసు పలుకుతున్నారు. 36వ వార్డులో గత కొన్ని నెలలుగా అనుమతులు లేకుండా నిర్మిస్తున్న భవనం పరిస్థితిపై సంబంధిత పట్టణ ప్రణాళిక కార్యదర్శి విట్టల్‌ను ఆరా తియ్యగా.. కాకమ్మ కబుర్లు చెప్పుతూ తప్పించుకొని తిరుగుతున్నాడు. ఇప్పటికే రూ.లక్షలాది సొమ్మును తన ఖాతాలో వేసుకొని ఆ వార్డులో ఇన్‌ఛార్జీ మాత్రమే చేస్తున్నాను. పూర్తిస్థాయిలో సమాచారం కావాలంటే భవనం వద్దకు వెళ్లి తెలుసుకొండి అని ఉచిత సలహాలు ఇస్తున్నారు. ఇదే క్రమంలో 35వ వార్డు వెలంపేటలో నిర్మిస్తున్న మరో భారీ భవనానికి సంబంధించి సంబంధిత పట్టణ ప్రణాళిక కార్యదర్శి శ్వేతని వివరణ కోరగా ఆ భవనానికి పూర్తిస్థాయి అనుమతులు ఉన్నాయని, ఎటువంటి అదనపు అంతస్తులు నిర్మించలేదని మసిబూసి మారేడుకాయ మాటలతో తప్పించుకుంటున్నారు. ఈమెకు కూడా పెద్ద మొత్తంలో సొమ్ములు ముట్టాయని, పైగా ఓ కార్పొరేటర్‌ నిర్మిస్తున్న భవనం కావడంతో తానే దగ్గరుండి అక్రమ నిర్మాణానికి సంబంధించి అన్ని పనులు చూసుకుంటున్నారని సమాచారం.
జోన్‌-4 పట్టణ ప్రణాళిక విభాగంలో అందరికీ సమాన వాటాలు ఉంటాయని సంబంధిత కార్యాలయంలో గుసగుసలు గట్టిగానే వినిపిస్తున్నాయి. గతంలో ఛైన్‌మాన్‌లు చేసిన పనులను ఇప్పుడు నేరుగా టౌన్‌ ప్లానింగ్‌ సెక్రటరీలు చేస్తున్నారని పలువురు ఆరోపిస్తున్నారు. జోనల్‌ కార్యాలయంలో ఉండే అధికారులకు ఓ రేటు.. తమకు మరో రేటును ముందస్తుగానే ఒప్పందం చేసుకొని దండీగా దండుకుంటున్నారు. ఈ వ్యవహారంలో నకిలీ విలేకరులు కలుగజేసుకొని ఆరా తీస్తే వాళ్లకు కొంత సొమ్మును కట్టబెట్టి నిర్మాణాలను శెరవేగంగా కట్టుకుంటున్నారు.
వార్డు స్థాయిలో ఓ అక్రమ నిర్మాణం నిర్మించాలంటే మొదటిగా జీవీఎంసీ నుంచి అనుమతి పొందిన సర్వేయర్‌లు నకిలీ ప్లాన్‌లను తయారు చేసి ఓ కోడిరగ్‌ పద్ధతిలో సంబంధిత టౌన్‌ప్లాన్‌ంగ్‌ అధికారికి అందిస్తున్నారు. అక్కడ నుంచి ఇరు వర్గాల మధ్య రహస్య సమావేశాలను ఏర్పాటు చేసి ఒప్పందం చేసే వరకు పూర్తి బాధ్యత సర్వేయర్‌లే తీసుకుంటారు. ఆ తరువాత ప్లానింగ్‌ సెక్రటరీ ద్వారా మరోమారు దాడి చేసి మరోమారు రూ.లక్షల సొమ్మును రుచి చూస్తారు. అక్కడితో వదిలిపెట్టకుండా ప్లానింగ్‌ కార్యదర్శి మరికొంత సొమ్ము తీసుకొని చూసి చూడనట్టు వార్డులో వ్యవరిస్తారు.
